Батыс Қазақстан облысында «Келешек мектебі» концепциясын жүзеге асыру аясында педагогтерге арналған арнайы оқыту тренингтері қолға алынуда. Осы бағытта «Өрлеу» БАҰО» АҚ «БҚО бойынша КДИ» филиалының тренерлері облыстағы 5 «Келешек мектебі» базасында педагогикалық ұжымдармен тәжірибеге бағытталған тренингтер өткізіп, командалық өзара әрекеттестікті нығайтуға арналған тың тәсілдерді таныстыруда.
⠀
Облыста ашылған «Келешек мектептері» педагогтері министрлік тапсырмасына сәйкес бұған дейін базалық деңгей курстарында біліктілігін арттырған болатын. Ендігі кезекте бұл мектептерде ұжымдық бірлік пен серіктестік мәдениетін жүйелі қалыптастыруды көздейтін тренингтер жалғасуда.
⠀
Тренингтер №2 Подстепной ЖОББМ, №51, №52 ЖОББМ, Бәйтерек ауданы Қадыр Мырза Әлі атындағы мектеп және Достық ЖОББМ базасында ұйымдастырылуда. Әр білім беру ұйымындағы тренинг қатысушылары практикалық жаттығулар арқылы ортақ мақсатқа бірігудің тиімді әдістерін меңгерді.
⠀
Шараның негізгі мақсаты – педагогтер арасында сенімге негізделген орта қалыптастыру, бірлескен әрекет арқылы командалық ауызбіршілікті арттыру, көшбасшылық пен өзара қолдауды дамыту. Бұл бағытта ұстаздар команда ретіндегі рөлдерін қайта қарастырып, бір-бірін қолдаудың, тыңдаудың және ортақ шешім шығарудың маңызын терең сезінуде.
⠀
Жайлы мектеп – бірлік пен сенімге сүйенген мықты команданың нәтижесі!
