«Өрлеу» біліктілікті арттыру ұлттық орталығы» АҚ барлық филиалдарында, соның ішінде Атырау облысы бойынша Кәсіби даму институтында ZOOM-конференция арқылы ұжымдық тыңдалым өтті.
Шара барысында Мемлекет басшысы Қасым-Жомарт Тоқаевтың Қазақстан халқына арнаған «ЖАСАНДЫ ИНТЕЛЛЕКТ ДӘУІРІНДЕГІ ҚАЗАҚСТАН: ӨЗЕКТІ МІНДЕТТЕР ЖӘНЕ ОЛАРДЫ ЦИФРЛЫҚ ТРАНСФОРМАЦИЯ АРҚЫЛЫ ШЕШУ ЖОЛДАРЫ» атты Жолдауы кеңінен түсіндіріліп, негізгі бағыттары талқыланды.
Жолдаудың негізгі аспектілерін – Мемлекет тарихы институтының Еуразиялық және саяси зерттеулер бөлімінің жетекшісі, саясаттану ғылымдарының докторы, профессор – Венера Абыханқызы Жексембекова жан-жақты түсіндіріп берді. Ол өз сөзінде ел дамуының жаңа кезеңінде цифрлық серпін мен адами капиталды нығайтудың ерекше маңыздылығына тоқталды.
Жолдауда адами капиталды дамыту, ғылым мен білімді интеграциялау, инновацияларды қолдау, сондай-ақ цифрлық трансформацияның жаңа мүмкіндіктері жан-жақты қарастырылды.
Әсіресе Мемлекет басшысы жасанды интеллектті меңгерудің маңыздылығына тоқталып, бұл үдерістен педагогтар да шет қалмауы керектігін атап өтті. Ұстаздардың кәсіби дамуы мен оқыту тәжірибесіне ЖИ технологияларын енгізу – білім саласын жаңа деңгейге көтерудің басты алғышарты екені ерекше айтылды.
Осындай мазмұнды шаралар ұстаздар мен қызметкерлердің ел дамуына қосар үлесін арттырып, кәсіби дамуына тың серпін береді.