Түркістанда «Өрлеу» біліктілікті арттыру ұлттық орталығы» АҚ-ның Түркістан облысы бойынша Кәсіби даму институты ресми түрде жұмысын бастады.
Іс-шара дәстүрлі батамен басталды. Ақ батасын ардагер ұстаз, «Құрмет» ордені мен «Ерен еңбегі үшін» медалінің иегері, КСРО халық ағарту ісінің үздігі, қала мен облыстың құрметті азаматы Жарқынбек Құлбайымбетов берді. Жаңа филиалдың ашылу лентасын ҚР Оқу-ағарту министрлігінің Орта білім беру комитетінің төрағасы Қаныбек Жұмашев пен Жарқынбек Құлбайымбетов қиды.
Келушілерге жаңа филиалдың оқу кеңістігін таныстырылды. Ғимаратта STEAM зертханасы, психология студиясы, ICT-коворкинг сияқты заманауи жабдықталған орталықтар бар.
Ашылу күнімен қатар «Өрлеудің» тамыз конференциясы өтті. Биылғы басқосу «Педагогтың үздіксіз кәсіби дамуы: жаңа міндеттер және шешімдер» тақырыбына арналды. Жиында білім саласын жетілдіруге, жаңа деңгейге көтеруге септігін тигізетін нақты идеялар мен түрлі тәжірибелер талқыланды.
Жаңа филиалдың ашылуы – өңір ұстаздарының кәсіби дамуына арналған заманауи білім беру ортасын қалыптастырудағы маңызды қадам.
