Медетбекова Меруерт Аскарбековна «Өрлеу» БАҰО АҚ «Шымкент қаласы бойынша кәсіби даму институты» филиалының директоры лауазымына тағайындалғаны туралы хабарлаймыз.
Медетбекова Меруерт Аскарбековна 1969 жылы 18 мамырда дүниеге келген. 1992 жылы М. О. Әуэзов атындағы Шымкент педагогикалық институтын «Қазақ тілі мен әдебиеті» мамандығы бойынша үздік дипломмен тәмамдаған.
Кәсіби мансабында ол Шымкент облысының ауыл орта мектебінде қазақ тілі мен әдебиеті пәнінің мұғалімі, сондай-ақ Шымкент қаласының орта мектебінде жұмыс істеді. 2001 жылдан бастап Меруерт Аскарбековна Х.А. Ясауи атындағы Халықаралық қазақ-түрік университеті, Шымкент әлеуметтік-педагогикалық университеті және М. Әуэзов атындағы Оңтүстік Қазақстан мемлекеттік университеттерінің қазақ тілі кафедрасында оқытушы лауазымдарын атқарды.
2007 жылы А. Байтурсынов атындағы Тіл білімі академиясының аспирантурасын тәмамдап, кандидаттық диссертация қорғап, филология ғылымдарының кандидаты дәрежесін алды. Меруерт Аскарбековна шамамен 100 ғылыми мақаланың және 4 әдістемелік құралдың авторы.
2014 жылдан 2018 жылға дейін «Өрлеу» БАҰО АҚ Оңтүстік Қазақстан облысы филиалының педагогикалық қызметкерлердің біліктілігін арттыру институтында «Менеджмент және басқару» кафедрасының меңгерушісі болды. 2019 жылдан бастап Шымкент қаласы Білім басқармасының Әдістемелік орталығын басқарды. 2023 жылдың шілдесінен бастап Қазақстан Республикасы Білім және ғылым министрлігінің Тәрбиелік жұмыс және қосымша білім беру департаментінің директоры лауазымын атқарды. Осы қызметте Мемлекет басшысының тапсырмасымен «Біртұтас тәрбие» бағдарламасын әзірлеуге белсене қатысып, білім беру ұйымдарында оның сәтті жүзеге асырылуын қамтамасыз етті.
2024 жылдың 19 қарашасынан бастап Меруерт Аскарбековна ТМД елдеріндегі халықаралық қордың президентінің кеңесшісі болып тағайындалды.
Ол білім беру саласындағы жетістіктері үшін мемлекеттік және ведомстволық наградалармен марапатталған.