Алматы қаласындағы №133 мектеп-гимназияда жасанды интеллектті білім беру процесінде қолдануға арналған республикалық семинар-практикум өтті. Іс-шараны Өрлеу Біліктілікті арттыру ұлттық орталығының Алматы қаласы бойынша КДИ Жаратылыстану-математика бағытындағы кафедрасы ұйымдастырды.
Семинарға Қазақстанның әр өңірінен келген тәжірибелі де жас педагогтар жиналып, сабақта ЖИ құралдарын қолданудың нақты тәсілдерін үйренді. Қатысушылар үшін бұл тек теориялық кездесу емес, технологияны бірден сынап көретін практикалық алаң болды.
Семинарды білім саласында жаңа технологияларды дамытуға үлес қосып жүрген жетекші мамандары Сәуле Талапеденовна Мухамбетжанова мен Жанар Алибековна Жартынова өткізді. Олар мұғалімдерге жасанды интеллекттің мүмкіндіктерін түсіндіріп, оқу процесін жеңілдететін және тиімді ететін құралдарды нақты мысалдармен көрсетті.
Іс-шара барысында педагогтар:
- нейрондық желілердің қалай жұмыс істейтінін,
- ЖИ арқылы оқу материалы мен тапсырма дайындаудың жолдарын,
- бағалауды автоматтандыру мүмкіндіктерін,
- сабаққа интерактив пен шығармашылық элементтер қосуды
үйренді.
Мұғалімдер бірнеше ЖИ сервисін пайдаланып көріп, оларды өз пәніне қалай бейімдеуге болатынын тәжірибе арқылы түсінді.
Көптеген педагогтар үшін бұл семинар ЖИ құралдарын алғаш рет тереңірек танып-білуге мүмкіндік берді.
Қатысушылар:
- сабақ дайындауға кететін уақытты қысқартудың жолдарын,
- оқушыларға жеке бағдар беруге көмектесетін сервистерді,
- жаңа форматтағы шығармашылық тапсырмалар жасауды
үйреніп шықты.
Семинар соңында педагогтар өз өңірлерінде ЖИ-ді енгізу тәжірибесімен бөлісіп, ортақ кәсіби мәселелерді талқылады.
133-мектеп гимназиясында өткен бұл семинар жасанды интеллекттің білім беру саласындағы рөлі күннен күнге артып келе жатқанын көрсетті. Педагогтар жаңа технологияларды меңгеріп, оларды сабақта тиімді қолдануға нақты қадамдар жасады.
Шара мұғалімдер үшін әрі пайдалы, әрі шабыт беретін кәсіби кездесу болды.